سلطانُ الفقرا، سلطانُ اولیاء،غوث الورٰ، نرالی سرکار پاک
خواجہ محمد حفیظ اللہ رحمتہ اللہ علیہ

آنحضور نرالی سرکار پاک ؒ کی ولادت با سعادت ۹ اپریل ۱۹۰۱ ء ، ۱۹ ذوالحجہ ۱۳۱۸ ہجری کو بروز منگل کی شب تیسرے پہر بڑیلہ شریف ضلع گجرات میں ہوئی جس وقت تہجد گزار جب تہجد کے لئے اُٹھےتو صبح صادق جیسا اُجالا دیکھ کر چونک اُٹھے اور گُمان کرنے لگے کہ آج تہجد قضا ہو گئی۔در حقیقت آپ کی ولادت کے وقت ایک نُور کی شُعا ع آسمان سے خطِ مستقیم بنائے ہوئے حضور خواجہ غریب نواز ؒ کے دولت کدہ مبارک پر مرتکز ہے اور اُسی کے نُور نے صبح کا سماں پیدا کیا ہوا ہے۔
آپ کے والدِ گرامی حضور خواجہ غریب نواز حضرت مولانا مولوی مُحبّ النبی عبدالغنی چشتی نظامی رحمتہ اللہ علیہ بھی ایک عظیم ا لمرتبت برگزیدئہ خُدا ہستی تھے جو اپنی ذات میں تمام کمالات ِ ظاہری و باطنی کے جامع تھے۔

آنحضور نرالی سرکار پاک ؒ کی روحانی تربیت آپ کے والدِ گرامی کی زیرِ نگرانی اپنی نُورانی تربیت گاہ میں ہوئی اور ظاہری تعلیم کا حصول بھی ساتھ ساتھ بڑیلہ شریف کے اپنے تعلیمی مرکز میں ہوا۔ حضور پاک نے اپنی خُداداد ذہانت و قابلیت کے باعث قرآنِ کریم ڈیرھ سال کے عرصہ میں فنی تجوید کے ساتھ پڑھ لیا۔ قرآنِ کریم آپ کو زُبانی یاد تھا مگر آپ نے اپنے آپ کو کبھی حافظ یا قاری ظاہر نہیں فرمایا۔ حضور سرکار پاک ؒ نے اپنے پیرو مُرشد آنحضور پاک سرکارِ عالی بابوغلام سرور ؒ کے ارشاد کے مطابق اپنا مطب خانہ بھی کھولا اور ایک گورنمنٹ خالصہ ہائی سکول ٹانڈہ (ضلع گجرات) میں بحیثیت مدرس ملازمت بھی کی ۔

ایک مرتبہ حضور سرکار پاک ؒ نے لاہور شریف اپنے پیرو مُرشد حضور سرکارعالی ؒ کے دربارِ فیض بار میں مستقل قیام رکھا ہوا تھا آپ کے مُرید ِ خاص آپ کی خدمت میں حاضر ہونے کے لئے گجرات شہر میں ایک پیٹرول پمپ پر بس کے انتظارمیں کھڑے ہوئے تھے راولپنڈی سے نیو خان کی بس آئی اور کنڈیکٹر نے آواز دی صرف دو سواریاں لاہور شریف کی ۔ ساتھ کھڑا ہوا شخص جلدی سے بس میں سوار ہو گیا جب مُریدِ خاص بس پر چڑھنے لگے تو کنڈیکٹر نے دھکا دیکر نیچے گِرا دیا اور بس کی گھنٹی بجا دی اور بس چلی گئی۔کچھ دیر دوسری بس آئی اِس کے ڈرائیورنے آواز دی کہ حافظ صاحب آئو ۔ مُریدِ خاص اُن کو پہچان نہ سکے مگر سمجھے کہ حضور سرکار پاک ؒ کے خادم ہوں گے ۔وہ اُن کے ساتھ بیٹھ گئے اور اُنہیں یاد آیا کہ کرایہ تو گھر پر دوسری قمیض میں چھوڑ آئے ہیں کنڈیکٹر جب اِ ن کے پاس آیا تو ڈرائیور صاحب نے کہا اُستاد جی یہ میرے بزرگ ہیں اور میری سرکار کے دربار شریف جا رہے ہیں اِن سے کرایہ نہ لیںیہ سُن کر مُریدِ خاص نے شُکر ادا کیا کہ پردہ رہ گیا۔راستے میں ڈرائیور صاحب نے ایک مٹھائی کا ڈبہ اور کچھ سموسے کھانے کے لئے اِ ن کو دیے مُریدِ خاص نے وہ سب کھا لیے کچھ دیر بعد بس جب کامونکی کے قریب سے گزری تو مُریدِ خاص دیکھتے ہیں کہ جس بس سے اِن کو دھکا دیا تھا وہ بس اُلٹی پڑی تھی۔ معلوم ہونے پر پتہ چلا کہ بس کنڈیکٹر بھی مرنے والوں میں شامل ہےجب اِنہوں نے کنڈیکٹر کی لاش دیکھی تو اِنہیں یاد آیا کہ یہ وہ کنڈیکٹر نہیں تھا جس نے اِن کو دھکا دیا تھا۔وہ کوئی اور شخص تھالاہور شریف پہنچ کر جب مُریدِ خاص حضور سرکار پاک ؒ کے کمرے میں تشریف لے گئے تو حضور سرکارپاک ؒ نے اپنا چہرہ مبارک دیوار کی طرف کر لیااور پُرجلال انداز میں ارشاد فرمایا!
’’او بے وقوف دھکا تو تُجھے حضورنے ہی دیا اور پھر ساتھ بھی حضور ہی تُجھے لے کر آئے ۔تُجھے دھکا نہ دیتے تو پھر کیا کرتے ۔ تُو اتنا مدہوش ہو گیا ہے نہ پاس کرایہ ، نہ کھانا کھایا اور پھر اُس بس میں بیٹھنے لگا تھا جس نے لاہور شریف پہنچنا ہی نہیں تھا۔‘‘

آنحضور سرکار پاک ؒ ۵شوال ۱۳۹۶ھ بمطابق ۳۰ ستمبر ۱۹۷۶ ء بروز جمعرات کو ظاہری وصال فرمایا آپ کا دربار فیض بار بڑیلہ شریف ضلع گجرات میں مرجع خلائق خاص وعام ہے۔